Algunhas cifras sobre a ciberseguridade nas redes galegas

Imaxe

A plataforma BitSight, que calcula un ‘Índice de Ciberseguridade’ para todas as entidades con presenza na internet, proporciona tamén datos de interese para analizar o estado da ciberseguridade no ámbito territorial. Así, informa de que o índice de ciberseguridade de Galicia, calculado a partir dos achados correspondentes a todas as direccións IP xeolocalizadas na Comunidade, é lixeiramente máis alto que a media de España (610 fronte a 600) e está moi próximo ao da Comunidad de Madrid, que cun valor de 620 obtén a maior valoración entre as comunidades españolas.

Un dos datos de maior interese para a cidadanía é a clasificación das principais topoloxías de tráfico malicioso. Durante o mes de maio foron as seguintes:

Nome

Últimos 30 días

Últimos 7 días

Cambio

RootSTV

9.0%

12.5%

+ 40%

ArrkiiSDK

10.9%

9.7%

- 11%

Mirai

14.8%

9.6%

- 35%

AMCleaner

7.1%

7.1%

+ 1%

CrossRider

4.7%

4.5%

- 3%

Triada

3.2%

4.2%

+ 32%

HiddenAds

3.1%

2.7%

- 10%

Crackonosh

2.2%

2.7%

+ 24%

Gamarue

2.0%

2.7%

+ 34%

 

RootSTV é un malware que ataca a dispositivos con capacidade IPTV (televisión por internet) con versións antigas de Android. Coidado coas TV Box para ver canles de todo o mundo non certificadas por Google!

ArrkiiSDK, Triada e HiddenAds tamén son específicos dos sistemas Android.

Mirai instálase en dispositivos IoT como cámaras, ou en routers, e convérteos en membros dunha rede de botnets con diversos propósitos maliciosos, como ataques distribuídos de denegación de servizo (DDoS).

AMCleaner afecta a dispositivos Macintosh; Conficker, Crackonosh e Gamarue son propios da contorna Windows, e finalmente, CrossRider é unha extensión maliciosa de navegador e é multiplataforma.

As principais conclusións que se desprenden destes datos son que non hai ningunha contorna intrinsecamente segura, e que sexa cal for a nosa, todos debemos tomar precaucións: como mínimo dispoñer de aplicacións anti-malware e ser coidadosos coas aplicacións e extensións do navegador que instalamos nos nosos equipos, evitando as de orixes dubidosas.

Ademais, os sistemas desactualizados ou sen soporte son presa fácil de aplicacións maliciosas, e aquí debemos incluír tanto equipos de sobremesa como terminais móbiles… e calquera aparello que admita conexións (un router, unha Smart TV…), que non deixan de ser ordenadores de distintas capacidades e con distintas funcións. Mención especial para aqueles dispositivos conectables accesibles desde internet e aos que non se lles cambian as credenciais de acceso que traen por defecto.