BOE e INCIBE publican o Código de Dereito da Ciberseguridade

Que normas legais rexen cando se trata de ciberseguridade? Unha pregunta cuxa resposta non era nada sinxela, mesmo para os profesionais que tivesen a necesidade de coñecelas: nada menos que 42 textos legais fan referencia á ciberseguridade no corpus lexislativo español.

A partir desta iniciativa do BOE e INCIBE será máis sinxelo consultar todos os textos legais sobre esta temática, incluíndo ademais referencias á normativa europea, xa que se recompilaron nun único texto: o Código de Dereito da Ciberseguridade.

Este documento está dispoñible para descarga desde o 28 de decembro de 2022, coa posibilidade, se se é usuario do servizo ‘Mi BOE’, de recibir notificacións cada vez que sexa actualizado.

Para facilitar a procura de información, os textos legais agrupáronse en nove seccións:

• Constitución Española
• Normativa de Seguridade Nacional
• Infraestruturas Críticas
• Normativa de Seguridade
• Equipo de Resposta a Incidentes de Seguridade
• Telecomunicacións e Usuarios
• Ciberdelincuencia
• Protección de Datos
• Relacións coa Administración