Celebración da Xornada de Ciberseguridade na FP

O pasado 10 de abril tivo lugar no CIFP Politécnico de Santiago a Xornada de Ciberseguridade na FP correspondente ao curso 2024-2025, unha iniciativa dedicada á ciberseguridade e ás tecnoloxías abertas no contexto educativo e profesional e orientada ao profesorado e alumnado das especialidades de ciberseguridade na Formación Profesional.

Durante a mañá desenvolvéronse catro relatorios técnicos sobre seguridade dixital, privacidade, criptografía e uso de ferramentas de software libre, impartidos por profesionais do sector:

• O poder da soberanía dixital: como combatir o cibercrime e protexer a privacidade. Alberto González Gómez, xefe do equipo contra a Ciberdelincuencia da Garda Civil da Coruña.
• Ciberseguridade: Xestión en Stellantis e visión de futuro. Cristina Isabel Martínez Castañeda, responsable de instalacións xerais e ciberseguridade en Stellantis. 
• Ameazas de Ciberseguridade comúns no sector eléctrico e como afrontalas. Luis Álvarez Patiño, CISO en Itelsis, e David Castro Ramírez, Director de Operacións de Enerxe.
• Wargames: o outro lado do ben. Rafael Villaverde, CEO de cloud.gal e infonet.es.

Para facilitar o seguemento, todos eles foron difundidos en directo a través da plataforma YouTube.

A xornada completouse con ata nove obradoiros prácticos, tanto no CIFP Politécnico de Santiago como no IES San Clemente, centrados na adquisición de competencias técnicas a través da resolución de retos e da experimentación directa con ferramentas e escenarios reais de ciberseguridade.

A xornada consolídase así como un referente na formación en ciberseguridade dentro da FP galega, fomentando a colaboración entre centros educativos e entidades do sector.