Cita coa ciberseguridade en Vigo

Naceu en 2017 como a xuntanza informal dun grupo de afeccionados á ciberseguridade, compartindo coñecementos en charlas nun ambiente distendido, foi medrando ano tras ano ata converterse nun dos congresos de referencia no ámbito da ciberseguridade a nivel estatal. Hoxe, o Vicon está plenamente consolidado no calendario dos grandes eventos do sector.

O crecemento da disciplina e o bo facer da organización lograron atraer aos mellores expertos tanto a nivel nacional como local.

Este ano, a organización pon un especial foco na visibilidade do traballo desenvolvido polos Corpos e Forzas de Seguridade do Estado, contando coa participación de membros do Mando Conxunto do Ciberespazo, o Servizo de Ciberintelixencia e diversos grupos arroba da Garda Civil e Policía Nacional.

O programa desta edición inclúe numerosas charlas de alto nivel técnico, pensadas para satisfacer tanto a profesionais do sector como a persoas afeccionadas á ciberseguridade. Os contidos abranguen desde análise forense e pentesting ata intelixencia de ameazas ou seguridade en infraestruturas críticas, convertendo o Vicon nun espazo ideal para aprender, actualizar coñecementos e descubrir as últimas tendencias do sector.

Entre os moitos momentos destacados do evento, cabe resaltar a mesa redonda de ciberseguridade na alta dirección, na que responsables de ciberseguridade, executivos financeiros e directores de empresas debaterán sobre a súa visión da ciberseguridade desde o ámbito do negocio, a tecnoloxía e a xestión do risco.

Ademais, os asistentes poderán participar en talleres prácticos de gran interese, como o de Linux Purple Lab: Ataque, monitorización e detección, OSINT (Investigación en fontes abertas), Ciberseguridade e Blockchain, e un taller de Lockpicking, no que se ensina a arte de abrir fechaduras e dispositivos de seguridade física mediante a análise e manipulación dos seus compoñentes.

O Vicon consolídase así como unha cita imprescindible para profesionais e entusiastas da ciberseguridade, tanto en Galicia como a nivel nacional, favorecendo o intercambio de coñecementos e a colaboración entre expertos e institucións de relevancia.

As persoas interesadas en asistir ao Vicon poden comprar as súas entradas nesta ligazón. Todos os eventos, excepto o taller de "OSINT", celébranse de maneira presencial no Círculo de Empresarios Galicia (en Vigo) os próximos 25 e 26 de abril.