Convocatoria IN519H: Axudas de Industria Dual para empresas galegas nos ámbitos da Seguridade, Defensa e Aeroespacial

Co fin de apoiar a cadea industrial galega no proceso de produción de bens e servizos tecnolóxicos de uso dual, a Xunta de Galicia convoca as axudas de Industria Dual destinadas a empresas con centro de traballo en Galicia que proxecten levar a cabo investimentos vinculados aos ámbitos da Seguridade, Defensa e Aeroespacial.

Esta convocatoria resulta de especial interese para empresas do ámbito TIC e da ciberseguridade, xa que contempla proxectos relacionados con tecnoloxías duais con aplicación civil e militar, incluíndo a seguridade física ou cibernética. Entre as aplicacións subvencionables inclúense, de forma non exhaustiva, a ciberseguridade e resiliencia de sistemas informáticos interconectados fronte a ameazas híbridas, o reforzo de capacidades cibernéticas duais, as comunicacións seguras, os sistemas interconectados de recoñecemento e información e a seguridade de infraestruturas críticas e das súas redes.

O procedemento conta cunha dotación de 6.000.000 euros, cofinanciada pola Unión Europea no marco do programa Galicia Feder 2021-2027. As axudas poderán acadar ata 1.000.000 euros por empresa e proxecto, con intensidades máximas do 15 % para grandes empresas, 25 % para medianas empresas e 35 % para pequenas empresas. O prazo de presentación de solicitudes estará aberto desde o 4 de xuño de 2026 ás 9:00 horas ata o 4 de setembro de 2026 ás 14:00 horas.