Imaxe
A Escola Galega de Administración Pública (EGAP), en colaboración coa Axencia para a Modernización Tecnolóxica de Galicia (Amtega), convoca o Curso superior de implantación da ciberseguridade nas administracións públicas: ciberseguridade nos tempos da intelixencia artificial e a nube. Esta formación ten como obxectivo reforzar os coñecementos do persoal empregado público en materia de ciberseguridade desde unha perspectiva normativa, técnica e práctica.
O programa abordará as principais tendencias e desafíos actuais da ciberseguridade, con especial atención á seguridade na nube, á aplicación da intelixencia artificial tanto na prevención como na execución de ciberataques, á ameaza cuántica e á ciberseguridade industrial. Tamén se tratarán cuestións relacionadas coa xestión de incidentes, a ciberintelixencia, os riscos na cadea de subministración e as auditorías de cumprimento do Esquema Nacional de Seguridade (ENS).
O curso está dirixido prioritariamente ao persoal empregado público con perfil TIC da Administración autonómica, das súas entidades públicas instrumentais e da Administración institucional, pertencente aos subgrupos A1 e A2 do persoal funcionario ou aos grupos I e II do persoal laboral. No caso de quedar prazas vacantes, poderán acceder outros colectivos de persoal empregado público, segundo as condicións establecidas na convocatoria.
A actividade formativa desenvolverase entre o 9 de novembro e o 21 de decembro de 2026, cunha duración total de 111 horas lectivas. A modalidade será mixta, combinando sesións presenciais en Santiago de Compostela, telepresenza e teleformación. O curso contará con 70 prazas e incluirá unha proba final de avaliación en liña.
O prazo de inscrición a través da plataforma da EGAP permanecerá aberto ata as 23:59 horas do 3 de novembro de 2026. As persoas interesadas poden consultar os requisitos de participación e o programa completo na ficha do curso e na convocatoria publicada no Diario Oficial de Galicia.
