Google lanza un programa para empresas especializadas en ciberseguridade

O programa diríxese ás startups europeas que buscan escalar as súas actividades internacionalmente e cuxa actividade se centre nalgún elemento de ciberseguridade: prevención, protección e investigación, ou análise de ameazas. O obxectivo é proporcionar coñecementos, medios e asesoramento para o crecemento e a expansión.

Google fixo públicos os seguintes requisitos, imprescindibles, para que as candidaturas sexan tidas en conta ao seleccionar os participantes nesta edición da Growth Academy:

• Deberán ser empresas en fase inicial e Serie A: búscanse empresas emerxentes que xa teñan un produto ou servizo validado no mercado.
• Con sede en Europa: o programa está dirixido especificamente a empresas emerxentes europeas que buscan crecer a escala internacional.
• Deben ter a súa actividade enfocada nalgún aspecto da ciberseguridade: búscanse empresas emerxentes que traballen en solucións relacionadas coa prevención, a protección, a investigación, a análise de ameazas ou a compartición de ameazas.
• Ter capacidade de tracción demostrable: a empresa xa debe estar a xerar ingresos ou adquirindo usuarios.

O programa comezará en abril, e as empresas interesadas que cumpran cos criterios expostos deberán presentar a súa candidatura para formar parte do mesmo antes do 12 de febreiro na seguinte ligazón.