Nova Oficina de Ciberseguridade do Ministerio de Xustiza

O Ministerio de Xustiza pon en marcha unha Oficina de Ciberseguridade para reforzar e homoxeneizar en todo o Estado a seguridade da información dixital da Administración de Xustiza fronte a ciberameazas ou ciberataques.

O servizo será prestado por un equipo de profesionais especializados, e ofrecerá como mínimo as seguintes prestacións:

• Elaboración do desenvolvemento normativo da política de seguridade da información, en liña coa lexislación vixente na materia, como o Esquema Nacional de Seguridad (ENS), o Esquema Judicial de Interoperabilidad y Seguridad (EJIS) e a lexislación sobre a protección de datos de carácter persoal.

• Elaboración do plan de adecuación ao Esquema Nacional de Seguridad (ENS).

• Asesoramento para a posta en marcha ou mantemento de procedementos técnicos.

• Implantación de ferramentas para compartir información.

• Actividades de formación e concienciación en seguridade, incluíndo difusión de guías ou instrucións.

• Apoio na xestión de ciberincidentes.

• Realización de auditorías de seguridade para detectar vulnerabilidades ou defectos de seguridade.

Esta oficina prestará servizo a todas as administracións implicadas no Comité Técnico Estatal de la Administración Judicial Electrónica (CTEAJE).