O Consello Europeo adopta o Regulamento de Ciberresiliencia, unha nova normativa sobre a seguridade dos produtos dixitais

O Consello Europeo adoptou unha nova normativa que regula os requisitos en materia de ciberseguridade que deben cumprir produtos con elementos dixitais. Así, o Regulamento de Ciberresiliencia (Cyber Resilience Act, en inglés) ten como obxectivo garantir que dispositivos como cámaras domésticas, frigoríficos, televisores e xoguetes conectados sexan seguros antes de que estean dispoñibles para a súa compra por parte do usuario. Ademais, esta nova normativa nace para dar resposta ás carencias do marco lexislativo vixente e ser máis coherente.

O novo acto lexislativo introduce requisitos de ciberseguridade a escala da UE para o deseño, o desenvolvemento, a fabricación e a introdución no mercado de produtos de hardware e software. O regulamento aplicarase a todos os produtos conectados directa ou indirectamente a outro dispositivo ou a unha rede, pero aplicaranse excepcións como o software de código aberto ou servizos que xa están contemplados por outras normativas, por exemplo os dispositivos sanitarios, a aviación civil ou os vehículos.

Os produtos de software e hardware levarán a marcado CE para indicar que cumpren os requisitos do Regulamento. As letras “CE” aparecen en moitos produtos comercializados no mercado único ampliado do Espazo Económico Europeo (EEE), e indica que os produtos vendidos no EEE foron avaliados e cumpren uns requisitos elevados en materia de seguridade, saúde e protección do medioambiente.

Desta maneira e grazas á nova normativa, os consumidores poderán ter en conta a ciberseguridade á hora de escoller e utilizar produtos que conteñen elementos dixitais.