Se recibiches un correo cunha notificación da Policía Nacional non descargues o arquivo, é un malware

Nivel de alerta
Medio

Detectouse unha campaña que suplanta á Policía Nacional, utilizando a técnica de phishing, coa que se pretende distribuír un malware a través de notificacións que fan referencia a un suposto informe policial emitido e unha advertencia de citación, solicitando á persoa que reciba o devandito correo a comparecer como testemuña nunha audiencia que se celebrará un día determinado.

Para iso, o usuario dispón dunha ligazón que supostamente contén a descarga da citación, aínda que en realidade esa descarga ten un arquivo con contido malicioso.

Descrición de accións para evitar o risco ou solucionalo

No caso de que recibises un correo electrónico que parece ser da Policía Nacional, citándote como testemuña nunha suposta audiencia, pero non interactuaches coa ligazón nin descargaches o arquivo que vén adxunto, clasifícao como spam e bórrao da túa bandexa de entrada.

Se descargaches o arquivo, pero non o executaches, é importante que o elimines do teu cartafol de descargas e da papeleira de reciclaxe.

En cambio, se descargaches e executaches o arquivo para obter información sobre a suposta citación, é recomendable que realices os seguintes pasos:

  • Desconecta o equipo comprometido da rede doméstica para previr a propagación do malware a outros dispositivos.
  • Mantén actualizado o antivirus e efectúa un escaneo total do sistema para asegurarte de que se atopa fóra de perigo.
  • Se crees que o dispositivo pode continuar infectado, debes valorar restablecelo á súa configuración de fábrica para desinfectalo. 
  • Toma capturas de pantalla do email e dos arquivos adxuntos para usalas como evidencias no caso de que presentes unha denuncia ante as Forzas e Corpos de Seguridade do Estado. 
  • Sempre podes comprobar que se trata dunha comunicación oficial a través da plataforma da Policía Nacional  ou chamar ao teléfono 017 do INCIBE para obter consellos de expertos en ciberseguridade.

Información relacionada