Apertura do prazo de inscrición para o curso gratuíto Cisco CCNA Cyberops Associate ata o 13 de abril

Dende o 31 de marzo ata o 13 de abril estará aberto o prazo de inscrición para o curso gratuíto Cisco CCNA Cyberops Associate. Este curso proporciona os coñecementos e habilidades necesarios para que os analistas de seguridade de nivel asociado desempeñen as súas tarefas nun centro de operacións de seguridade (SOC). O curso aborda conceptos fundamentais de seguridade e habilidades para supervisar, detectar, analizar e responder a ameazas como ciberdelincuencia, ciberespionaxe e ameazas avanzadas. Tamén inclúe a aplicación práctica de habilidades para garantir a seguridade operativa e a dispoñibilidade dos sistemas en rede.

Os obxectivos deste curso son: 

• Comprender os principios, roles e responsabilidades involucrados nas operacións de ciberseguridade, así como as tecnoloxías, ferramentas, regulacións e estándares dispoñibles.

• Describir vulnerabilidades e ameazas comúns en dispositivos de usuario e infraestruturas de rede.

• Demostrar habilidades fundamentais aplicadas ao seguimento, detección, investigación, análise e resposta a incidentes de seguridade.

• Clasificar eventos intrusivos segundo categorías definidas por modelos de seguridade e establecer accións defensivas.

• Realizar con éxito as tarefas, deberes e responsabilidades dun analista de seguridade de nivel asociado nun Centro de Operacións de Seguridade (SOC).

Este curso está dirixido a profesionais de IT, como enxeñeiras/os de redes e administradoras/es de redes, que desexen iniciarse na ciberseguridade, mellorando o seu coñecemento e experiencia nesta área en crecente demanda e nos procedementos empregados nun Centro de Operacións de Seguridade -SOC.

Información relevante do curso Cisco CCNA Cyberops Associate:

• Metodoloxía híbrida (presencial e virtual). 

• Número de prazas limitado a 20 prazas.

• Unha vez finalizado o prazo de inscrición, o 22 de abril ás 18:30 h realizarase unha proba técnica presencial de selección no CNTG en Santiago de Compostela.

• A duración do curso será de 80 horas  (40h presenciais, 40h virtuais). 

• O curso desenvolverase do 26 de maio ao 20 de xuño co seguinte horario: de luns a venres de 16:30 a 20:30 horas.  

• As clases presenciais serán os días 26, 27 e 28 de maio, así como 2, 4, 5, 9, 12, 16 e 19 de xuño. As clases virtuais terán lugar o 29 e 30 de maio, así como o 3, 6, 10, 11, 13, 17, 18 e 20 de xuño.

• A matrícula é gratuíta, inclúe o diploma de asistencia e a opción gratuíta dun exame de certificación oficial.

Para obter máis información sobre o curso, pódese acceder ao seguinte enlace da páxina web do CNTG, onde se atopa toda a información detallada e onde se poderá realizar a inscrición: Cursos - Cisco CCNA Cyberops Associate.

Estas formacións gratuítas forman parte do investimento que fai a Consellería de Emprego, Comercio e Emigración no marco do proxecto do Centro de Innovación e Competencia en Ciberseguridade, no contexto do Programa RETECH. No proxecto do Centro participan as comunidades de Galicia, Cataluña e Valencia, estando liderado desde a rexión galega pola Axencia para a Modernización Tecnolóxica de Galicia (Amtega).