A Amtega inicia na Rede CeMIT un novo ciclo formativo para un Nadal máis seguro

A chegada do Nadal trae consigo un notable incremento das compras en liña e tamén das tentativas de fraude que buscan aproveitar a actividade propia destas datas. Para axudar á cidadanía a anticiparse a estes riscos, a Amtega pon en marcha o novo ciclo formativo «Prepárate para un Nadal ciberseguro», que se desenvolverá en 22 aulas da Rede CeMIT.

Esta actividade ten como finalidade ofrecer ferramentas prácticas e fáciles de aplicar que permitan identificar as principais ameazas da tempada. Ao longo deste obradoiro práctico de hora e media de duración, as persoas participantes aprenderán a recoñecer ofertas falsas, evitar trampas asociadas ao Black Friday, detectar mensaxes fraudulentas e realizar compras en liña con maior seguridade. Ademais, trataranse aspectos clave para protexer dispositivos e xoguetes intelixentes, cada vez máis presentes entre os agasallos destas datas.

As sesións celebraranse de maneira presencial en diferentes aulas da Rede CeMIT, xa dispoñibles para a súa inscrición.

Cada unha delas pode ser consultada na Axenda deste portal.