Imaxe
Unha interrupción xeneralizada en Cloudflare, un dos principais provedores de infraestrutura de Internet a nivel mundial, provocou o 18 de novembro de 2025 fallos intermitentes e erros 500 en múltiples plataformas e servizos de alto perfil. O incidente afectou a millóns de usuarios e pon de novo o foco na elevada dependencia global deste tipo de servizos.
O 18 de novembro de 2025, Cloudflare sufriu unha degradación interna nun dos seus servizos centrais que desencadeou erros HTTP 500 e unha interrupción parcial en varias das súas funcionalidades principais, incluíndo o panel de control, as APIs de cliente e parte dos seus servizos de rede. Esta situación xerou cortes en numerosas páxinas web e aplicacións que dependen desta infraestrutura.
A incidencia afectou especialmente aos servizos baseados na súa rede de distribución de contidos (CDN), á plataforma de mitigación de ataques DDoS e aos servizos de DNS, o que provocou que múltiples plataformas de alto tráfico quedasen inaccesibles ou funcionasen de forma irregular durante parte da mañá.
Segundo informou a compañía, a orixe estivo nun pico de tráfico inusual que alterou o comportamento interno dun dos sistemas encargados de xestionar o fluxo global de datos. A interrupción propagouse rapidamente pola infraestrutura de Cloudflare, afectando servizos dependentes en todo o mundo.
Millóns de usuarios sufriron erros, lentitude ou imposibilidade de acceder a determinados servizos. Coas medidas de mitigación aplicadas, Cloudflare comunicou unha recuperación progresiva, aínda que advertiu que se poderían producir anomalías ata completar a estabilización do servizo.
A análise oficial da causa raíz aínda non foi publicada, pero os primeiros datos apuntan a un fallo interno debido a tráfico anómalo, sen evidencias dun ataque malicioso.
As administracións públicas, empresas TIC, servizos dixitais e organizacións galegas que empregan solucións de Cloudflare puideron notar afectacións directas ou indirectas. Este episodio subliña a necesidade de:
- Avaliar dependencias críticas de terceiros.
- Incluir escenarios de caída masiva nos plans de continuidade do negocio.
- Implantar rutas alternativas ou mecanismos de redundancia cando sexa tecnicamente posible.
Recomendacións
- Revisar que servizos propios dependen de Cloudflare e o impacto potencial dunha caída.
- Verificar SLAs e a cobertura fronte a interrupcións severas.
- Actualizar os plans de resposta ante incidentes para incorporar fallos de provedores globais.
- Realizar probas de resiliencia que simulen cortes inesperados de infraestruturas críticas.
