A Garda Civil advirte sobre o aumento preocupante nos casos de fraude de provedores, máis concretamente na manipulación de facturas. Este tipo de estafas convertéronse nunha ameaza en auxe para empresas de calquera sector.
Metodoloxía deste tipo de estafas
A fraude dirixida a provedores implica que os ciberdelincuentes se fagan pasar por empresas lexítimas, utilizando métodos como a falsificación de facturas a través de correos electrónicos fraudulentos suplantando a identidade do provedor lexítimo (email spoofing) que ofrecen confianza ás empresas para enganalas e obter pagamentos indebidos. Tamén poden acceder ao buzón de correo do provedor por medio dun phishing ou un ataque de forza bruta, permitindo aos ciberdelincuentes interceptar os correos e responder en caso necesario para seguir co engano. Esta práctica pode provocar perdas financeiras de importancia considerable e danar a reputación da entidade afectada.
Para previr este tipo de estafa, ínstase ás empresas a implementar as seguintes medidas concretas:
-
Verificación rigorosa de provedores
Antes de realizar pagamentos, é fundamental verificar a identidade e lexitimidade dos provedores realizando comprobacións de antecedentes, investigar o seu historial comercial, asegurarse de que estean rexistrados legalmente e verificar a autenticidade dos correos electrónicos.
-
Establecemento de políticas de seguridade
Implementar procedementos internos robustos para a xestión de facturas e pagamentos. Isto pode incluír a revisión e aprobación de facturas por múltiples niveis de autorización e a verificación cruzada da información de facturación cos rexistros de compra.
-
Concienciación e capacitación do persoal
Capacitar os empregados sobre os riscos asociados coa fraude de provedores e como identificar sinais de advertencia, fomentando unha cultura de conciencia e vixilancia constante en toda a organización, facendo fincapé no que respecta á manipulación de facturas.
-
Colaboración con empresas especializadas en prevención de fraudes
Considerar colaborar con provedores de servicios especializados na detección e prevención de fraudes. Estes provedores poden ofrecer solucións tecnolóxicas avanzadas e asesoramento experto para fortalecer as defensas contra a fraude.
A implementación destas medidas concretas pode axudar a diminuír o risco e salvagardar a integridade do contorno empresarial.
