Apertura do prazo de inscrición para o curso gratuíto Certified Information Security Manager (CISM) - 2ª edición (Xestor Certificado de Seguridade da Información ) ata o 13 de abril

Ata o 13 de abril estará aberto o prazo de inscrición para a segunda edición do curso de Xestor Certificado de Seguridade da Información. O curso está dirixido a conseguir a certificación CISM, certificación líder recoñecida internacionalmente para xestores de seguridade da información emitida pola entidade certificadora ISACA.

Os obxectivos deste curso son: 

• Explorar a importancia do goberno da seguridade da información no contexto do goberno global da empresa.

• Identificar e analizar os requisitos legais e contractuais que afectan á empresa.

• Explicar a importancia das métricas no desenvolvemento e avaliación da estratexia de seguridade da información.

• Aplicar estratexias de avaliación de riscos para reducir o impacto do risco de seguridade da información.

• Valorar os tipos de ameazas ás que se enfronta a empresa.

• Sintetizar os compoñentes e recursos empregados para desenvolver un programa de seguridade da información.

• Describir os procesos e resultados relacionados coa recuperación ante desastres.

• Explicar o impacto das métricas e das probas ao avaliar o plan de resposta a incidentes.

Este curso está dirixido especialmente a xestoras/es experimentados en seguridade da información que teñen responsabilidades de xestión de seguridade da información, consultoras/es informáticos, auditores/as, xestores, oficiais de privacidade, oficiais de seguridade da información, administradoras/es de rede, administradores/as de dispositivos de seguridade, enxeñeiras/os de seguridade, etc

Información relevante do curso de Xestor Certificado de Seguridade da Información: 

• Modalidade virtual. 

• Número de prazas limitado a 20 prazas. 

• Unha vez finalizado o prazo de inscrición, o 24 de abril realizarase unha proba de selección presencial no CNTG en Santiago de Compostela, que constará dunha proba técnica. 

• A duración do curso será de 30 horas. 

• O curso desenvolverase do 12 ao 21 de maio co seguinte horario: de luns a xoves de 16:30 a 20:30 horas e o venres de 16:30 a 18:30.

• A matrícula é gratuíta, inclúe o diploma de asistencia e a opción gratuíta dun exame de certificación oficial.  

Para obter máis información sobre o curso, pódese acceder ó seguinte enlace da páxina web do CNTG, onde se atopa toda a información detallada e onde se poderá realizar a inscrición: Curso - Xestor Certificado de Seguridade da Información (CISM) . 

Estas formacións gratuítas forman parte do investimento que fai a Consellería de Emprego, Comercio e Emigración no marco do proxecto do Centro de Innovación e Competencia en Ciberseguridade, no contexto do Programa RETECH. No proxecto do Centro participan as comunidades de Galicia, Cataluña e Valencia, estando liderado desde a rexión galega pola Axencia para a Modernización Tecnolóxica de Galicia (Amtega).