Imaxe
No Bos Días da TVG (19/12/2025), Inés Amor, Policía Nacional, advertiu que nas semanas do Nadal medran as compras en liña e, ao mesmo tempo, as estafas. A idea central da súa intervención é a chamada á prudencia fronte a webs clonadas e ofertas demasiado agresivas, así como os avisos falsos de paquetería que buscan capturar datos.
Entre os riscos salientados están as páxinas fraudulentas e clonadas, incluídas as que ofertan décimos de lotaría por debaixo do prezo oficial ou prometen números supostamente esgotados. Tamén destacan as mensaxes de paquetería que solicitan pequenos importes (ás veces por baixo de 1€ ou 2–3€) para liberar envíos, co obxectivo de recadar datos bancarios e persoais. Con esa información poden realizar cargos indebidos e mesmo solicitar préstamos no nome das vítimas.
Como medidas prácticas, recomenda mercar lotaría só en administracións con identidade física verificable; desconfiar de prezos ‘demasiado bos’; comprobar sinais básicos na URL (HTTPS/cadeado) e a existencia de datos de contacto e posvenda; revisar opinións doutras persoas usuarias; e non premer en ligazóns non solicitadas. Se nalgún momento se piden datos bancarios, cómpre deter o proceso. Por riba de todo, ‘baixar a velocidade’ para neutralizar a enxeñaría social que aproveita a présa destas datas.
Para ver a entrevista completa, pódese acceder aquí
https://www.agalega.gal/videos/305988-bos-dias-19-12-2025
e visualizar no minuto 1h33m48s.
Información relacionada
Ligazóns de interese
