Imaxe
Este novo ciclo formativo achegará á cidadanía recomendacións prácticas para facer fronte aos principais riscos de ciberseguridade asociados ao Nadal e ás compras en liña. Ao longo das sesións abordaranse situacións cada vez máis habituais, como as estafas relacionadas co Black Friday e as compras en Internet, os falsos sorteos e promocións, as mensaxes fraudulentas ou as páxinas web creadas para enganar ás persoas usuarias. Co obxectivo de aprender a identificar estes sinais de alerta e coñecer pautas sinxelas para mercar e navegar de forma máis segura, a Amtega coa colaboración da Rede CeMIT poñen en marcha o novo ciclo formativo «Prepárate para un nadal ciberseguro».
A través dun enfoque práctico e accesible, as persoas participantes coñecerán os principais riscos que poden xurdir durante o período de Nadal, especialmente no contexto das compras en liña, as promocións e as ofertas que se multiplican nestas datas.
Ao longo desta formación abordaranse situacións habituais como o Black Friday, as falsas ofertas e promocións, os sorteos fraudulentos, as tendas en liña falsas ou as mensaxes relacionadas con pedidos e entregas. Tamén se explicarán as principais técnicas empregadas para enganar ás persoas usuarias e ofreceranse recomendacións para realizar compras de forma máis segura, comprobar a fiabilidade das páxinas web e evitar fraudes.
No que vai de ano xa se impartiu unha primeira quenda de obradoiros, coa temática de “Uso seguro do móbil: configuración e protección”. En total impartíronse 22 sesións, para cerca de 300 usuarios participantes.
As sesións celebraranse de maneira presencial en diferentes aulas da Rede CeMIT, xa dispoñibles para a súa inscrición.
