Fernando Suárez Presidente do Colexio de Enxeñaría en Informática de Galicia [CPEIG] sobre roubo contrasinais nada redes

Na entrevista realizada hoxe a Fernando Suárez, presidente do Colexio Profesional de Enxeñaría en Informática de Galicia (CPEIG), puxouse de manifesto a preocupante evolución do cibercrime, unha ameaza que deixou atrás a figura do atacante individual para converterse nunha auténtica industria global altamente organizada. Baixo o modelo coñecido como Crime-as-a-Service (Delincuencia como Servizo), este mercado ilícito move volumes económicos comparables aos das grandes economías mundiais.

Durante a súa intervención, Suárez explicou como o tráfico ilegal de accesos e credenciais roubadas, comercializadas na Dark Web ou a través de canles privadas de Telegram, sustenta boa parte desta actividade delituosa. O valor destas credenciais varía considerablemente segundo o obxectivo: mentres que unha conta persoal dunha rede social pode venderse por arredor de 40 euros, os accesos á rede interna dunha empresa poden alcanzar prezos de ata 100.000 euros.

Para facer fronte a esta ameaza crecente, o presidente do CPEIG recomendou adoptar medidas básicas pero fundamentais, como a autenticación en dous factores (2FA), combinando contrasinais con sistemas de verificación biométrica ou códigos temporais. Tamén incidiu na importancia de empregar contrasinais robustas e diferentes para cada servizo, así como de renovalas periodicamente. Ademais, animou a utilizar ferramentas públicas como Have I Been Pwned para comprobar se as credenciais persoais estiveron expostas en filtracións masivas de datos.

Suárez concluíu destacando a necesidade de reforzar a concienciación tanto no ámbito empresarial como nas administracións públicas, lembrando que a ciberseguridade é unha responsabilidade compartida e un elemento esencial para garantir un contorno dixital máis seguro e resiliente.