Representa o ciclo urbano da auga, desde a captación e potabilización ata a distribución e a depuración de augas residuais. Inclúe ETAP, depósito elevado, distribución ós edificios e EDAR.
Reproduce un sistema real de abastecemento de auga construído sobre tecnoloxía industrial Rockwell e dispositivos OT auténticos. Funciona como un proceso continuo de lazo pechado, con control de nivel e dosificación química, que permite ensinar principios de control PID e a xestión de alarmas en SCADA. Está aliñada cos estándares ISA/IEC 62443 e coa directiva NIS2, e demostra de forma tanxible o impacto físico que teñen as decisións tomadas desde o sistema de control.
A maqueta é un contorno completo para adestrar na operación segura de infraestruturas críticas de auga, un servizo público esencial. Permite ós participantes comprobar en primeira persoa as consecuencias físicas dunha mala configuración: desde elevar perigosamente a concentración de cloro ata deixar á rede sen subministración. Esta ligazón directa entre o que ocorre na pantalla e o que sucede no proceso real é o seu maior valor pedagóxico.
No plano técnico, serve para practicar o axuste de bucles de control, a calibración de sensores e a interpretación de alarmas de calidade da auga. En materia de ciberseguridade, articúlase arredor de dous exercicios principais. O primeiro é unha manipulación remota do proceso que recrea un ataque do estilo do incidente de Oldsmar: un atacante accede ó HMI mediante forza bruta sobre un contrasinal débil e altera os valores operativos, mentres o operador debe detectar a situación, verificar as alarmas e recuperar o control antes de que se vexa afectada a subministración. O segundo é un ataque Man-in-the-Middle sobre a comunicación entre o HMI e o PLC, no que se captura tráfico con Wireshark, se executa ARP spoofing e se manipulan os datos que chegan ó operador.
Tamén é idónea para avaliar estratexias de resiliencia e redundancia, ensaiar plans de continxencia propios do sector da auga e interiorizar contramedidas como contrasinais robustas, Dynamic ARP Inspection, segmentación por VLANs, Port Security, protocolos industriais seguros, cifrado TLS e monitorización con IDS industriais. En conxunto, inculca a necesidade de protexer servizos esenciais para evitar danos á cidadanía e ó medio ambiente.
